塊鏡照我唔到（下）
上集：https://bit.ly/3lBTJcO
我個腦一片混亂，呢段時間嘅壓力、恐懼，終於爆晒出嚟，我失聲痛哭。
「我想結婚，但我喺塊鏡度，見唔到自己啊。」我將所有嘢講晒出嚟，如果阿邦當我係怪物，咁就算啦。
「吓？」阿邦呆一呆：「我哋去照吓鏡。」
我好激動：「唔照啊！我都講晒畀你聽啦，你唔信我咩？我會拎呢啲嘢嚟開玩笑？」
阿邦問：「呢排你就係因為要逃避照鏡，避開所有鏡，所以成日都好緊張？」
我點點頭，阿嘅神情反而變得嚴肅，佢捉住我隻手：「咁我哋一定要照鏡，我唔係唔信你，但你要面對呢個恐懼。」
好快，我哋企喺商場嘅一塊鏡前，我合埋眼，拚命抗拒。
點知阿邦話：「咦，塊鏡度有你啊，好清楚啊，有咩問題？」
我睜開眼睛，望向塊鏡，咁耐冇接觸過鏡嘅發光，一瞬間有少少刺眼。
但鏡裡面依然冇我嘅倒影，我好失望：「你呃我。」
講完呢句之後，我馬上發現，鏡裡面都冇阿邦嘅倒影，我嚇一跳：「咪住先，點解你嘅倒影都唔見咗？」
「吓，兩個倒影我都見到，好正常喎。」阿邦答。
我哋面面相覷，然後阿邦問：「你之前有冇喺鏡中見過其他人嘅倒影？」
「我冇仔細睇，喺條街度見到鏡，我都會避開。」我諗一諗：「不過我有時遠遠望到鏡，都見到有人影㗎。」
「我同你喺鏡裡面睇到嘅嘢唔同，咁你依加仔細睇吓，描述你喺鏡裡面見到啲咩。」阿邦嘅語氣平靜而認真，我都慢慢冷靜落嚟。
我喺鏡裡面見到來來往往嘅路人，但當我擰轉頭比較吓，我就發現，鏡裡面見到嘅路人，根本唔係依加行緊嘅路人，不過擺設裝飾都一樣。
「我推測，你喺鏡裡面見到嘅，唔係『現在』，而係其他時間點，可能係過去，可能係未來。」
阿邦講：「喺嗰個時間點，我哋兩個唔係企喺鏡前，所以你見唔到我哋。」
我好似明白：「即係話，我喺鏡裡面係有倒影嘅，真正出問題嘅，係我對眼？」
阿邦微笑：「我唔會話係問題，我會話係『特異功能』。」
為咗確定呢件事，我先搵咗幾個朋友，藉故同佢哋一齊照鏡，確定佢哋喺鏡裡面都見到我。
無論係唔係特異功能，呢個時候，我已經鬆一口氣，畢竟唔會再有人發現，我喺鏡裡面冇倒影。
應該話，我係有倒影，我係好正常嘅，只係我睇唔到自己嘅倒影。
按照阿邦嘅安排，我返咗屋企，將一個電子鐘掛喺鏡前，測試我睇到嘅，係邊一個時間點。
結果，我哋發現，我可以喺鏡裡面睇到，三日後嘅情景。
阿邦好興奮：「即係話，我哋擺塊鏡喺電視前，你可以睇到股票、六合彩。」
「我仲可以……」我諗緊我仲可以做咩，實在太多太多，有咗呢個能力，我直情可以預知未來。
從此之後，我既可以選擇平凡地生活，亦可以用我嘅超能力，去達到我其他嘅目標。
我好開心，同時我忍唔住回想，點解一開始，我將呢件事當成災難，而唔係超能力？
無論係問吓朋友，鏡裡面見唔見到我；或者我留意吓街上嘅鏡，見唔見到其他人，我都會發現真相。
但我太過恐懼，見到鏡都會避開，更遑論仔細睇鏡裡面嘅情形，所以我就發現唔到。
面對問題，面對恐懼，甚至一點一滴咁研究恐懼，
先有機會戰勝恐懼，將你嘅恐懼變成機會。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #塊鏡照我唔到
Search